देवरूख – देवरूख शाळा क्र. ४ चे शिक्षक व पूर गावचे रहिवासी संदेश झेपले यांना रत्नागिरी येथे पार पडलेल्या निबंध स्पर्धेत उत्तेजनार्थ क्रमांक प्राप्त झाला आहे. यामुळे त्यांच्यावर देवरूख परिसरातून अभिनंदनाचा वर्षाव होत आहे.
देशभरात पंतप्रधान नरेंद्र मोदी यांच्या वाढदिवसानिमित्त विविध स्पर्धा आयोजित केल्या होत्या. भाजपा रत्नागिरी यांच्या वतीने जिल्हास्तरीय निबंध स्पर्धा आयोजित केल्या होत्या. मोदींची लोकप्रियता व त्यांच्या मार्गदर्शनाखाली होणारी देशाची वाटचाल यामुळे दक्षिण रत्नागिरीतील शेकडो स्पर्धकांनी खुल्या गटामध्ये झालेल्या या स्पर्धांमध्ये सहभाग घेतला होता. संदेश झेपले यांनी ‘आपले पंतप्रधान: नरेंद्र मोदी एक अंगार’? या विषयावर निबंध लिहला होता. त्यांचा हा निबंध तज्ञ परीक्षकांच्या पसंतीस उतरला. त्यांना उत्तेजनार्थ क्रमांक प्राप्त झाला. या स्पर्धेचे बक्षीस वितरण रत्नागिरी येथे भाजपा जिल्हाध्यक्ष दिपकजी पटवर्धन यांच्याहस्ते होणार आहे. यावेळी संदेश झेपले यांना प्रशस्तीपत्रक, सन्मानचिन्ह, रोख रक्कम देवून गौरविण्यात येणार आहे. शिवाय बक्षिस पात्र निबंध प्रकाशित केले जाणार आहेत. असे संयोजक निलेश आखाडे यांनी सांगितले.
संदेश झेपले यांनी यापूर्वी ही विविध स्पर्धेमध्ये सुयश मिळवले आहे. त्यांना निबंध स्पर्धा, विज्ञान प्रदर्शन, लेख स्पर्धा, भित्तीपत्रक स्पर्धा, चित्रकला स्पर्धा, पत्रलेखन स्पर्धा, हस्ताक्षर स्पर्धा, वक्तृत्व स्पर्धा आदी स्पर्धामध्ये तालुका, जिल्हा व राज्यस्तरावरील बक्षिसे मिळाली आहेत. त्यांना जिल्हा उपक्रमशील शिक्षक पुरस्कार, अरण्यपुत्र एकलव्य पुरस्कार, साहित्य रत्न पुरस्कार आदी पुरस्कार मिळाले आहेत. हे त्यांचे निबंधाचे २९ वे पारितोषिक आहे. त्यांच्या या यशाबद्दल त्यांचे आई वडील, पत्नी तसेच मित्र परिवार अशा सर्व स्तरातून त्यांच्यावर कौतुकाचा वर्षाव होत आहे. शाळेचे मुख्याध्यापक संभाजी पाटील, सर्व शिक्षक व शाळा व्यवस्थापन कमिटी पदाधिकारी यांनीही संदेश झेपले यांचे अभिनंदन केले आहे.
दखल न्यूज महाराष्ट्र.
नवरंग 
